BUKUSU CULTURAL CENTRE

KAMARORO KE LISISIMUKHA,BUNGOMA.

      PROF.BONAVENTURE WANJALA KERRE

      OMWENENDEBE

    BUKUSU COUNCIL OF ELDERS-KIMILILI

LILANDA LIE SIBUKUSU NE PROF.KERRE NE BAYETI BEWE DAYIREKITA PRIVER TOYWA NE EKOKWA YE BASAKHULU BABUKUSU

Sikhale khukhwiyamanwa khuba enjeko khubuli mulala muliloba limufu,engalukhani yekhumanya kumwima kwo omurwo kwabele nekufukilibwa nebakali eyi nabebilila sikhale,lulomo ne kumwima kwe khukhwama mukholo chabwe.

Mumakachula nende Omuprofesa Wanjala Kere,oli omwene bisali bie sikhale sio Omubukusu(Bukusu Cultural center-Kamukuywa) mulisasa lia Kimilili mulikunda lie Ebung'oma,abola mbo ekileko engali yakobolele omwana mubukusu khulondekhane ne liliebilila lie kamekesio ke sikhale khumima ne lulomo lwe babukusu.

 silalakho khu silibwa sie babukusu

Omuprofesa Wanjala Kere khuba omwekesi we sisomelo sia angaki sia Eldoret nekhuba omukhalabani we enganga mulirambo lia Kenya enyuma we khukhwiyamanwa nende omuruki we Lirambo aluno ari Dkt.William Ruto  nga Omurana,sakebilila khukhebulila khuchililisia sikhale ta.

Lukendo lwa Wanjala wa Kere mumarambo kabukhane engelekha lwaba lwe luyali khumanyilisiakho kamebesio ke kamarambo ako mukhukhusia sikhale siabwe.

Nekaba nalomaloma nechisenyenge cha Nakhalondo ndala mumakachula nomuandiki we kamakeni Sakwa Simiyu,Kere abola mbo kaba neliliesindukha libofu  khuba mulirambo lia France nio aba narebwa nende mulalakho khukhwimba ne khukelesia nga bakhina.Likhua lino liakholelela Kere Naba nekamebasio kekhunyindalisia sikhale sio omubukusu.

Bubwombakhi bwe bisali bie Sikhale khukhwombakhwa ne Wanjala Wa Kere buli bwe khurera sikuri sie kamekesio ne kimima kio omubukusu kikiatiba khukobola mulimenya lia aluno ari.

Ne khulondekhane ne litinyilisia lie sikhale khukhwikichibwa ne bubwimelesi bwe kamatembeli malala mbo eli engila ye khukhingilila lilanda lie bukuristayo,Kere abele neliliechuba mbo bukhalabani bwe khukhwakila sikhale sebulikho nende likhingilila liosiliosi khubukuristayo ta.

.    Omwimelesi we bisali bia kamukuywa,prof.Kerre.

"Khale bakuka befwe nga benamanga muchinamwima(shrines),nga basalanga Wele kabaulilanga,nono Wele yakhaba abundu osiosi newibombia wamusaya nakhuulila", Kumulomwa kwa Kerre.

Mubisali bia Kamukuywa bino khukhwombakhwa,yabele nga siko sie kamekesio khubasomi khurakikhila sikelo sia asi khucha khukhwola khubisomi biangaki khwabo basomela sikhale sie chimbotokhelela(Literature) nesikila birumikhwa biabechanga nebirumikhwa ne bakuka befwe nga khukhwitecha mulie,bubasi,kamasielo ke khuswala kumuse akari we kimisambwa kikindi kie omubukusu binyolekha abwenao.Bilalakho binyolekha mubisali bino nebili,Chinyuli,chikutusi,khakhendo,kamafumo,chingabo,kamasielo ke chisang'i,buyingo,esachi  nebibindi.

     Esachi

.   Bakeni ne babonakho binyolekhanamo

Biosi bino birumikhwanga nechikholo nabulebe khuchililisia kimisambwa kiabwe kili 10 mubabukusu;

1.Bung'osi

2.Buliuli

3.Bufumu

4.Kamaya

5.Bubasi-Lirumbi

6.Bukhebi(Embalu)

7.Bukimba(Efula)

8.Buliche(Engwe)

9.Efumbo

10.Khuswala kumuse(Esimbo)

.  Prof.Kerre no omukhaye wewe Pamela mumakachula nebamakhuwa.

Biakhulia be sikhale khwabo bekomba boosi bali ne bubweyangu bwe khubinyola musikuka sino nekhulimo;Bubwoba,busuma bwa Menula,namasaka ne kamalwa ke sikhale(Busaa)akari we biakhulia bibindi.

   kamalwa ka busaa

Mubisali bino chikholo chinyolekha mubabukusu 220 chaba nechikabwamo  mubilibwa 6;

1.Silibwa sia Kikai

2.Silibwa sia Silikwa

3.Silibwa sia Neala

4.Silibwa sia Nabayi

5.Silibwa sia Malaba

6.Silibwa sia Mwalie

Bisali bino biombakhwa khukhola bumenyelesi nekhura mumaandike Ekhole ya papa,lulomo lwefwe ne kumwima kwefwe nembo kumuchuli sikhale sio omubukusu sikhatiba ta.

 Khukhwola aluno ari enyuma we bisali bino khukhwombakhwa,kumukhung'ano kwe chindalo 3 kwekholekhanilamo nio liebweni liaba khurera alala basomesia be sibukusu ne basakhulu besibukusu ne ao nio baba lwebweni nabekesiana  nio omubukusu karakikhila,lie lie chikholo ne lukendo lwabwe khukhwola aluno ari.

Mumukhung'ano kuno omukeni we luyali kaba 

Omunyikhinyi omukhulu musikuka sie Kamarumbi(PS for Industrialization) Dr.Juma Mukhwana,Dr.Mukhisa Kituyi ne Prof.Adrian Wekulo Mukhebi.

 Prof.Kerre,Dr.Juma Mukhwana,Dr.Mukhisa Kituyi ne Prof.Adrian Mukhebi mumukhung'ano mubisali bie sikhale  Kamukuywa.

Bisali bino lundi biabia nebing'ona sikuri sie  kimibayo chindalo chibili -mubukhino(Bungoma Has talent)nio bapeni banyola bubweyangu bwe khukhwekesia kimikabwa kiabwe musambo ye likhina lie kamabeka.Omukeni we luyali mubukhino buno kaba Omusibayi musikuka sie kimibayo ne Sikhale mulirambo lino Omwami Ababu Namwamba.

Kamaroro ke ebweni kali mbo khucha khukhola linyalikha khubalaya abundu ano abe siko sia buli siamulala khukhwikomba khwola ano khusoma ne khubona bindu ngano na ngano nekhulimo Batali boosi bacha khukila erundo ye Ebung'oma khuba angaki.

Sikhebo sio omubukusu nende chikokwa che khukaya ne khukeleka kamakhuwa kabukhane khwabo beyamana khunyindalisha sibukusu bioosi biliba nebikholebwa ano.

LIMANYA LIE SIBUKUSU LIYETA ENDA YA MULEMBE KHUNYOLA LILIARO LIE BURUKI BWE SIBALA?

Yee, khulondekhana nelilibasia lia Kerre lili mbo omwana wenda ya Mulembe mumakhabi kamakali atibianga bubweyangu bwe khukhwirekekha khuenja buruki bwe lirambo nesifuno sie khutamba endomela ndala mukhukisa kamakhuwa kabwe kakhecha khuulilikhana nende omuro.Kerre abola ali nokendelela chikholo chichindi mulirambo lino ebele mumilukha kie kamasika,onyola buli sindu bakachulila mundomo chabwe nekhubola mbo omukeni nalio kene abe nakalukhasibwa khale.Nekhali khumwana mubukusu sekafwana kario ta obona kera mululomo nilwo buli sia mulala aulila ne abwenao nio omuro anyolelanga bubweyangu bwe khumanya chindengarengekha cho  omubukusu mubukhangarani,liba likholelelanga nekhutibia.

Lisubila lia Kerre lili mbo bakhangarani khukhwama munda ya Mulembe baba nekumoyo kwe khukisa kamakhuwa kabwe nekhulomela mululomo lwabwe,lilinyala liaba lienganga khukhwinyola nabaruka.

Lilombakha lie bisali bino,sili sifuno sie bibindu bikali nekhulimo kamakambila kacha khurera alala babemelesi ne bakhangarani be Ebuluyha khukendela alala nekhulekha khubasana nembo bafumbusie bubwami bwe mulirambo lino khukhwola mubikalabo bioo Omuluyha.

BUKHALABANI BUCHA KHUNYOLEKHA ANO.

Bisali bie sikhale sie Babukusu(BCC),biombakhwa khuchililisia kumwima nikwo bakuka befwe barakikha bise bia anyuma aa nekhulimo;Sikhebo,Ekhoyo ye Eng'anana,Kamakambila akari we kakandi.

Sikhebo-sicha khuba nesichilila khukhwikholekhanila abundu ano nga engila ndala ye khuchoya endakano ya Mango mubabukusu.Chindengarengekha chiliyo khulondekhana nga babana benya khwingila bakhemenge khulondekhana ne Bilibwa biabwe.

Sisialukho siosi enyuma we bafulu bano khukhwama mumakombe kabwe,lirengekha lie sisialukho silichilila mumombakhi kano.

Kamakambilo-Khulondekhana ne likeleka lie kimima muchikholo khutumbukha,ano eli nga enjeko ye khukambila nekhukololosia kamakhikha kanyala kanyolekha mubabukusu.Ekokwa ye basakhulu be simachamacha eli ano eli bureke khukhwakanila buli sia mulala okhobirira mumatinyu nga kemumalia,Kimisambwa nembo banyole buelelo bwe khumalao kamanyasio kano.

  Prof.Kerre naana kamakambilo

Libeyisiana nende Eng'anana-khwabo bali neliliekomba lie khunyola bakhaye ne basecha,ano sili sikuri sie khukholelao kumukhung'ano kwe khubaambasia nebarakikhe bumenyo mumalia kabwe.Kumuse kwe lifukilisiana lie bukhwe liosi licha khuba neliekholekhanila ano mungila engololofu nga  bakuka banyoa ebweni bakholanga.

Kimibayo ne bukhino-Khwabo babana bekomba khurusira ano chirekodi che bukhino nende khukwekesia kimikabwa kiabwe,boosi bali ne bubweyangu bwe khukholela mubisali bino,nesikila kamaroro ka Prof.Wanjala Wa Kerre kali khuchililisia sibukusu siefwe.

Barana khukhwama mumbo mwe lirambo bakholanga bung'oosi,bukimba bwe efula ne kamaya kabukhane kacha khumanyikha mubana befwe basomela sikhale.

Ndalakho chikholo chinyolekha mubilibwa nabulebe

BIBINGILO BIO OMUBUKUSU

  Kamaandike ko,

Omunamakhuwa,

Simiyu Sakwa

Tel.0797272770/0702022524